ވީއޭއެމްގެ ޔޫތު ޑިވެލޮޕްމަންޓް ކޮމިޝަންގެ މަސައްކަތްތައް ހުއްޓުމަކަށް؟ ތަޖުރިބާކާރު ކޯޗުން ބާކީވެފައި.

ވީ.އޭ.އެމްގެ އަސާސީ ގަވާއިދުގައިވާ ގޮތުން، ޔޫތު ޑިވެލޮޕްމަންޓް ކޮމިޝަނަކީ ރާއްޖޭގެ ޒުވާން ވޮލީ ކުޅުންތެރިން ކުރިއަރުވައި، އެ ކުޅިވަރުގެ ބިންގާ ވަރުގަދަކުރުމުގެ މައިގަނޑު މަސްއޫލިއްޔަތު ހަވާލުކުރެވިފައިވާ ގުނަވަނެވެ. މި ކޮމިޝަން އެކުލަވައިލުމުގެ މައިގަނޑު މަގުސަދަކީ، ރާއްޖޭގައި ތިއްބެވި އެންމެ ތަޖުރިބާކާރު ކޯޗުންގެ ފަންނީ އިރުޝާދުގެ ދަށުން، ވޮލީބޯޅައިގެ ކުރިމަގު ބައްޓަންކުރުމެވެ.

ނަމަވެސް، 18 ފެބްރުއަރީ 2024 ގައި ކޮމިޝަނަރ އޮފް ސްޕޯޓްސް މި ގަވާއިދު ތަސްދީގުކުރެއްވި ފަހުން އަހަރަކަށްވުރެ ގިނަ ދުވަސް ވެފައިވާއިރު، މި ކޮމިޝަނަކީ ހަމައެކަނި ނަމެއްގައި އޮތް، އެއްވެސް ހަރަކާތެއް ނުހިންގާ މަރުކަޒެއް ކަމަށް ވޮލީގެ ދާއިރާގައި މަސައްކަތްކުރާ ފަރާތްތަކުން ތުހުމަތުކުރެއެވެ.

ވޮލީ އާއިލާގެ ބައެއް މެންބަރުން ފާހަގަކުރާ ގޮތުގައި، ޒުވާން ކުޅުންތެރިން ބިނާކުރުމުގެ މުހިންމު ދައުރެއް އަދާކުރަންޖެހޭ މި ކޮމިޝަން އޮތީ “ވާގިނެތިފައެވެ”. ބައެއް ކޯޗުންނާއި ކަމާގުޅުންހުރި ފަރާތްތަކުން ބުނާ ގޮތުގައި، މިއީ ކޮމިޝަނުގައި ތިއްބެވި ބޭފުޅުންގެ ގާބިލުކަން ނެތުމުން ނުވަތަ މަސައްކަތް ކުރަން ބޭނުން ނުވުމުން ދިމާވެގެން އުޅޭ މައްސަލައެއް ނޫނެވެ. އޭގެ ބަދަލުގައި، މިއީ އެސޯސިއޭޝަނުގެ އިދާރީ ހިންގުމުގެ ތެރެއިން ކުރިމަތިވާ ނުފޫޒުތަކުގެ ސަބަބުން، ކޮމިޝަނަށް މިނިވަންކަމާއެކު މަސައްކަތް ކުރުމުގެ ފުރުސަތު ނުލިބުމުގެ ނަތީޖާއެވެ.

މި ކޮމިޝަނުގައި ހިމެނިވަޑައިގަންނަވަނީ ރާއްޖޭގެ ވޮލީބޯޅައިގައި އެތައް އަހަރެއްގެ ތަޖުރިބާ ލިބިވަޑައިގެންފައިވާ، ގައުމީ ފެންވަރުގެ ކުޅުންތެރިން ބިނާކުރުމުގައި އިސް ދައުރެއް އަދާކުރައްވާފައިވާ ކޯޗުންނެވެ. އާންމު އުސޫލުން ބަލާއިރު، ތަމްރީނު ޕްރޮގްރާމްތަކާއި، ޒުވާން ކުޅުންތެރިންގެ ލީގުތަކާއި، އަދި ގައުމީ ފެންވަރުގައި ކުޅުންތެރިން ކުރިއެރުވުމުގެ މަގުޗާޓު އެކުލަވައިލުމުގެ އިސް ސަފުގައި ތިބެންޖެހޭނީ މި ބޭފުޅުންނެވެ. އެހެންނަމަވެސް، އެތެރޭގެ މަސްދަރުތަކުން ބުނާ ގޮތުގައި، އެ ބޭފުޅުންނަށް އެ މަސްއޫލިއްޔަތު އަދާކުރުމުގެ ބާރެއް ނުވަތަ އިދާރީ އެއްބާރުލުމެއް ނުލިބެއެވެ.

“މި ކޮމިޝަން އުފެއްދީ ތަޖުރިބާކާރު ކޯޗުންގެ ލަފާގެ މަތިން ޒުވާން ކުޅުންތެރިން ކުރިއަރުވަން. އެކަމަކު ފެންނަނީ އެ ފަންނީ މީހުން ބާކީކޮށްފައި ތިބި މަންޒަރު، ވޮލީގެ ދާއިރާގައި ހަރަކާތްތެރިވާ ފަރާތަކުން ކަންބޮޑުވުމާއެކު ބުންޏެވެ.”

ފާޑުކިޔާ ފަރާތްތަކުން ތުހުމަތުކުރާ ގޮތުގައި، މި މައްސަލައިގެ އަސްލަކީ އެސޯސިއޭޝަނުގެ އިދާރީ އިސް ބޭފުޅުން، ފަންނީ މީހުންނަށް ދޫކޮށްލަންޖެހޭ ކަންކަމުގެ ތެރެއަށް އަތްބާނައި، ނުފޫޒު ފޯރުވުމެވެ. އަސާސީ ގަވާއިދުގައިވާ ގޮތަށް ކޮމިޝަނަށް މަސައްކަތް ކުރުމުގެ ޖާގަ ނުދޭ ކަމަށް ގިނަ ބަޔަކު އިއްތިފާގުވެއެވެ.

ޔޫތު ޑިވެލޮޕްމަންޓް ކޮމިޝަން ހުއްޓިފައި އޮތުމުގެ ސަބަބުން، ވީ.އޭ.އެމްގެ ހިންގުމުގެ ނިޒާމާމެދު ވެސް ވަނީ ސުވާލު އުފެދިފައެވެ. ގިނަ ބަޔަކު ގަބޫލުކުރާ ގޮތުގައި، މި ކޮމިޝަނަށް ފުރުސަތު ދިންނަމަ، މިއަދު ރާއްޖޭގެ އެކި ކަންކޮޅުތަކުގައި ހުނަރުވެރި ކުޅުންތެރިން ދެނެގަނެ، އެ ކުދިންނަށް ބޭނުންވާ ތަމްރީނުތައް ވަނީ ފެށިފައެވެ. މި ފުރުސަތު ގެއްލިގެން ދިއުމަކީ މުޅި ކުޅިވަރަށް ލިބުނު ބޮޑު ދެރައެއް ކަމަށް އެ ފަރާތްތަކުން ސިފަކުރެއެވެ.

ރާއްޖޭގެ ވޮލީބޯޅަ އަލުން އާރާސްތުކޮށް، ސަރަހައްދީ ފެންވަރުގައި ވާދަވެރި ބަޔަކަށް ވުމަށްޓަކައި ޒުވާން ކުޅުންތެރިން ބިނާކުރުމަކީ އެންމެ މުހިންމު ކަންތައް ކަމަށް ދާއިރާގެ ތަޖުރިބާކާރުން އަބަދުވެސް ބުނެއެވެ. ނަމަވެސް، ފަންނީ އިރުޝާދުދޭނެ މިފަދަ ނިޒާމެއް ނެތުމުން، ކުރިއަށް އޮތް ޖީލުގެ ކުޅުންތެރިންނަށް ބޭނުންވާ ހުނަރާއި ތަމްރީނު ނުލިބި، ކުޅިވަރުގެ ފެންވަރު ދަށްވެދާނެ ކަމުގެ ބިރު ވަނީ ހީވެފައެވެ.

“ޔޫތު ޑިވެލޮޕްމަންޓް ކޮމިޝަނަކީ ރާއްޖޭގެ ވޮލީގެ ކުރިމަގުގެ އިންޖީނު ކަމަށް އަޅުގަނޑުމެން އުއްމީދުކުރިން. އަސާސީ ގަވާއިދު ފާސްވުމުން ހީކުރީ ފަންނީ މީހުންނަށް ކަންކަން ނިންމުމުގެ ބާރު ލިބޭނެ ކަމަށް. އެކަމަކު އިދާރީ ބޭފުޅުން މިކަން ހިފަހައްޓާފައި ބާއްވާނަމަ، ގަވާއިދުގައި މިފަދަ ކޮމިޝަނެއް އޮތުމުގެ އެއްވެސް މާނައެއް ނެތް،”  ތަޖުރިބާކާރު ކޯޗަކު ފާހަގަކުރިއެވެ.

ވޮލީ އާއިލާގެ އެދުމަކީ، ވީ.އޭ.އެމް އިން މި ކޮމިޝަނުގެ މިނިވަންކަން އިއާދަކޮށް، ތަޖުރިބާކާރު ކޯޗުންނަށް އެ ބޭފުޅުންގެ މަސްއޫލިއްޔަތު އަދާކުރުމުގެ ފުރުސަތު ދިނުމެވެ. އެހެންނޫންނަމަ، މި ކޮމިޝަނަކީ ހަމައެކަނި ކަރުދާހުގައި އޮތް ނަމަކަށް ވެގެންދާނެ ކަމަށް ގިނަ ބަޔަކު ގަބޫލުކުރެއެވެ.