ދިވެހިރާއްޖޭގެ އަންހެން ޤައުމީ ވޮލީބޯޅަ ޓީމުން މިހާރު ކުރިއަށްގެންދާ ފަރިތަކުރުންތަކުގައި، ކުޅުންތެރިންނަށް ބޭނުންވާ އަސާސީ ވަސީލަތްތައް، ޚާއްޞަކޮށް ތަމްރީނު ކިޓު ހަމައަށް ނުލިބުމާއި، މުހިންމު ސެޝަންތަކުގައި ރާއްޖޭގެ ކޯޗުން ހާޒިރުވެ ނުތިބޭ މައްސަލައިގައި ބޮޑެތި ކަންބޮޑުވުންތަކެއް ފެންމަތިވެއްޖެއެވެ.

ޖަޕާނުގެ ތަޖުރިބާކާރު ކޯޗު ޑައިޗީގެ ބެލުމުގެ ދަށުން ކުރިއަށްދާ މި ތަމްރީނުތަކަކީ ޤައުމީ ޓީމަށް އާ ދިރުމެއް ލިބޭނެ ކަމެއް ކަމަށް އުންމީދު ކުރެވުނު ނަމަވެސް، ފަރިތަކުރުންތަކުގެ މާޙައުލުން ފެންނަ ކަންކަމަށް ބަލާއިރު، އިދާރީ ގޮތުން ހުރި އަސާސީ މައްސަލަތަކުގެ ސަބަބުން ތަމްރީނުތަކުގެ ފެންވަރަށް ނޭދެވޭ އަސަރު ކުރަމުންދާކަން ވަނީ ފާހަގަކުރެވިފައެވެ.

މިގޮތުން އެންމެ ބޮޑު ކަންބޮޑުވުމަކަށް ވެފައިވަނީ، ދުވާލަކު ދެ އިރު ވަރުގަދަ ފަރިތަކުރުންތަކެއް ކުރިއަށްދާއިރު، ކުޅުންތެރިންނަށް ފޯރުކޮށްދީފައިވަނީ އެންމެ ތަމްރީނު ޖާޒީއެއް ކަމަށްވާ މައްސަލައެވެ. މިކަމާ ގުޅޭގޮތުން ޓީމުގެ އިސް ކުޅުންތެރިއަކު ފާހަގަކުރި ގޮތުގައި، ބޭރުގައި ކުރިއަށްދާ މި ތަމްރީނުތަކުގެ ތާވަލު ހުރިގޮތުން މިއީ ކުޅުންތެރިންނަށް ކުރިމަތިވާ ވަރަށް ބޮޑު ގޮންޖެހުމެކެވެ.

“އަޅުގަނޑުމެން އަތުގައި އޮންނަނީ އެންމެ ޓްރެއިނިންގ ޖާޒީއެއް. ހެނދުނާއި ހަވީރުގެ ސެޝަނަށްވެސް ޖެހެނީ އެއް ޖާޒީއެއް ބޭނުންކުރަން. ރޭގަނޑު ސެޝަން ނިންމާފައި އައިސް، އެ ދޮވެ ހިއްކައިގެން އަނެއްދުވަހު ހެނދުނު 6 ޖަހާއިރު އޮންނަ ސެޝަނަށް ތައްޔާރުވުމަކީ ވަރަށް ދަތި ކަމެއް،” އެ ކުޅުންތެރިޔާ ކިޔައިދިނެވެ.

މިއީ ހަމައެކަނި އުނދަގުލަކަށްވުރެ ބޮޑަށް، ތަމްރީނުތައް ރޭވުމާއި ޕްރޮފެޝަނަލްކޮށް ކަންކަން ކުރިއަށްގެންދިއުމުގައި ހުރި އުނިކަމެއްގެ ގޮތުގައި ބެލެވެއެވެ. ރޭގަނޑުގެ ސެޝަންތައް ލަސްވާ ވަގުތުތަކުގައި، ޖާޒީ ދޮވެ ހިއްކަން ލިބޭ ވަގުތު މަދުވުމާއި، ރާއްޖޭގެ ތެތްފިނި ހޫނުމިނުގެ ސަބަބުން އެއްރެއިން ޖާޒީ ނުހިކުމުގެ މައްސަލަ ކުރިމަތިވެއެވެ. މީގެ ސަބަބުން ކުޅުންތެރިންނަށް އަރާމުކުރަން ލިބޭ ވަގުތު މަދުވެ، ނަފްސާނީ ގޮތުންނާއި ޖިސްމާނީ ގޮތުން ތަމްރީނުތަކަށް ދޭންޖެހޭ ސަމާލުކަމަށް ބުރޫއަރައެވެ.

ޤައުމީ ފެންވަރުގެ ޓީމެއް ބޭރުގެ ކޯޗެއްގެ އިރުޝާދުގެ ދަށުން ތަމްރީނުވަމުންދާއިރު، މިފަދަ އާދައިގެ ކަންކަން ހަމަޖެހިފައި ނެތުމަކީ ބަލައިގަނެވޭނެ ކަމެއް ނޫން ކަމަށް މި ދާއިރާގެ މާހިރުން ދެކެއެވެ. ޚާއްޞަކޮށް، ޤައުމީ ކުޅުންތެރިންގެ މަހު އިނާޔަތް 5,000 ރުފިޔާއިން 7,000 ރުފިޔާއަށް ސަރުކާރުން ބޮޑުކޮށްދީފައިވަނީ ކުޅުންތެރިންގެ ފެންވަރު މަތިކޮށް، ޕްރޮފެޝަނަލް މާޙައުލެއް ބިނާކުރުމަށް ކަމަށްވާއިރު، އިދާރީ މިފަދަ އިހުމާލުތަކުގެ ސަބަބުން އެ މަޤްޞަދު ޙާޞިލުވުމަށް ހުރަސްއެޅެއެވެ.

މީގެ އިތުރުން، މިއަދުގެ ހެނދުނުގެ ސެޝަން ކުރިއަށްދިޔައިރު ރާއްޖޭގެ އެއްވެސް ކޯޗަކު ފެންނަން ނެތްކަންވެސް ވަނީ ފާހަގަކުރެވިފައެވެ. ބޭރުގެ ތަޖުރިބާކާރު ކޯޗު ޑައިޗީގެ ފަރާތުން ފަންނީ އުކުޅުތަކާއި ތަމްރީނުދޭނެ ގޮތްތައް ދަސްކުރުމުގެ ފުރުޞަތު ދިވެހި ކޯޗުންނަށް ލިބިގެންދާއިރު، އެ ވަގުތުތަކުގައި އެ ބޭފުޅުން ހާޒިރުވެ ނެތުމަކީ ވޮލީގެ މުސްތަޤުބަލަށް ލިބޭ ބޮޑު ގެއްލުމެކެވެ. ބޭރުގެ ކޯޗުގެ މުއްދަތު ހަމަވުމުން، ދިވެހި ކޯޗުންނަށް މި ތަމްރީނުތަކުގެ ފައިދާ އެންމެ އެދެވޭ ގޮތުގައި ޓީމަށް ނުފޯރުވޭނެ ކަމުގެ ބިރު މީގެ ސަބަބުން އުފެދެއެވެ.

ހަމައެއާއެކު، ތަމްރީނުތަކަށް ކުޅުންތެރިން ހާޒިރުވާ މިންވަރު އެއްވަރެއްގައި ނުހިފޭ މައްސަލަވެސް ވަނީ ފާހަގަކުރެވިފައެވެ. މުޅި ސްކޮޑް އެކުގައި ފަރިތަކުރުންތަކުގައި ބައިވެރިނުވުމަކީ ތަމްރީނުތަކުގެ ފެންވަރު ދަށްވެ، ރޭވުންތެރިކަމާއެކު ކުރިއަށްދިއުމަށް އޮތް ހުރަހެކެވެ.

މި ހުރިހާ ކަމަކަށް ބަލާއިރު، ވޮލީބޯލް އެސޯސިއޭޝަން އޮފް މޯލްޑިވްސް (ވީ.އޭ.އެމް) އިން މި މައްސަލަތަކަށް އަވަސް ޙައްލެއް ހޯދައިދޭން ޖެހެއެވެ. ކުޅުންތެރިންނަށް ބޭނުންވާ ސާމާނު ފޯރުކޮށްދިނުމާއި، ދިވެހި ކޯޗުންގެ ހާޒިރީ ކަށަވަރުކުރުމަކީ މިހާރުން މިހާރަށް ކުރަންޖެހިފައިވާ ކަންކަމެވެ.

ދިވެހިރާއްޖޭގެ ޤައުމީ ވޮލީ ޓީމަކީ ދިވެހިން ބޮޑު އުންމީދެއް ކުރާ ޓީމެކެވެ. އެހެންކަމުން، ކުޅުންތެރިންގެ އަސާސީ ބޭނުންތައް ފުއްދައިދީ، ލިބޭ ފުރުޞަތުތަކުގެ ބޭނުން އެންމެ ފުރިހަމައަށް ހިފޭނެ މަގު ތަނަވަސްކޮށްދިނުމަކީ ކުޅިވަރު ކުރިއެރުވުމަށް ކޮންމެހެން މުހިންމު ކަމެކެވެ.

މި ތަމްރީނުތައް ކުރިއަށްދާއިރު، ގިނަ ބައެއްގެ ސަމާލުކަން ހުއްޓިފައިވަނީ މި ކަންބޮޑުވުންތަކަށް އެދެވޭ ޙައްލެއް ލިބި، ރާއްޖޭގެ ވޮލީގެ މުސްތަޤުބަލަށް މި ޕްރޮގްރާމުގެ ފައިދާ ކުރާނެތޯއެވެ.