ދިވެހިރާއްޖޭގައި ބާއްވާ ބައިނަލްއަޤުވާމީ މުބާރާތްތަކަކީ ހަމައެކަނި ކުޅިވަރުގެ އީދެއްގެ ގޮތުގައި ދެކިގެން ފުދޭކަށް ނެތެވެ. މިއީ ރާއްޖޭގެ ކުޅުންތެރިންނާއި، ކޯޗުންގެ އިތުރުން، ވަކިން ހާއްސަކޮށް ރެފްރީންނަށް ބައިނަލްއަޤުވާމީ ފެންވަރުގެ ތަޖުރިބާ ހޯދައިދީ، އެމީހުންގެ ފަންނީ ގާބިލުކަން އިތުރުކުރުމަށް ލިބޭ މަދަދުގާރު ފުރުސަތުތަކެކެވެ. މިފަދަ ފުރުސަތުތަކުގެ ބޭނުން އެންމެ އެދެވޭ ގޮތުގައި ނުހިފިއްޖެނަމަ، އޭގެ ނޭދެވޭ އަސަރު މުޅި ވޮލީބޯޅަ އާއިލާއަށް ފޯރާނެއެވެ

ދާދި ފަހުން ރާއްޖޭގައި ބޭއްވި ‘ކާވާ’  ވިމެންސް ކަޕްގެ ރެފްރީން ކަނޑައެޅުމުގައި އަމަލުކުރި ގޮތާ މެދު އުފެދުނު ބަހުސްތަކުން ހާމަވަނީ، ރާއްޖޭގެ ވޮލީބޯޅަ ރެފްރީން ތަރައްޤީކުރުމާއި މެނޭޖްކުރުމުގައި ދިގުލީ ކަންބޮޑުވުންތަކެއް ހުރި ކަމެވެ

ކުޅިވަރުގެ ނިޒާމުގެ މައިބަދައަކީ ރެފްރީންނެވެ. ގާބިލު އަދި ތަޖުރިބާކާރު ރެފްރީން ނެތް ނަމަ، މުބާރާތްތަކުގެ އިތުބާރާއި ފެންވަރާ މެދު ސުވާލު އުފެދޭނެއެވެ. ރާއްޖެ ފަދަ ކުޅިވަރުގެ މާހައުލު ކުޑަ ގައުމެއްގައި، އަމިއްލަ ފަސްގަނޑުގައި ބާއްވާ ބައިނަލްއަޤުވާމީ މުބާރާތްތަކަކީ ރާއްޖޭގެ ރެފްރީންނަށް ރޭލެއްގެ ދަތުރުފަތުރާއި މާލީ ބުރައެއް ނެތި، އަގުނުކުރެވޭ ފަދަ ތަޖުރިބާ ހޯދުމަށް ލިބޭ ރަނުގެ ފުރުސަތެކެވެ. ނަމަވެސް، ވޮލީބޯޅަ އާއިލާގެ ގިނަ ބަޔަކު ގަބޫލުކުރާ ގޮތުގައި، މިފަދަ ފުރުސަތުތަކުގެ ބޭނުން ރާއްޖޭގެ ރެފްރީން ވަރުގަދަކުރުމަށްޓަކައި ހިކުމަތްތެރިކަމާއެކު ހިފަމުންނެއް ނުދެއެވެ

މި މައްސަލައިގެ ހަގީގީ އަސްލު ގުޅިފައިވަނީ، ރެފްރީންގެ ކުރިއެރުމާއި، ތަމްރީނާއި، އަދި މުބާރާތްތަކަށް ރެފްރީން ހޮވުމުގެ ޒިންމާ އުފުލާ ރެފްރީސް ކޮމިޝަނާއެވެ. މިފަދަ ކޮމިޝަންތަކުގެ އިސްވެރިންގެ އެންމެ ބޮޑު މަސްއޫލިއްޔަތަކީ، ދިވެހި ރެފްރީންނަށް ބޭނުންވާ އެހީތެރިކަން ފޯރުކޮށްދީ، ހަމަހަމަކަމާއި އިންސާފުވެރިކަމާއެކު އެމީހުންނަށް ކުރިއަށްދިއުމުގެ މަގު ފަހިކޮށްދިނުމެވެ

ރެފްރީން ހޮވާ އުސޫލުތަކާއި ފުރުސަތުތައް ބަހާލެވޭ ގޮތާ މެދު ޝައްކު އުފެދޭ ހާލަތްތަކުގައި، އެކަންކަން ސާފުކޮށްދީ، ދެފުށް ފެންނަ ނިޒާމެއްގެ ތެރެއިން ކަންކަން ހާމަކުރުމަކީ ކޮމިޝަންގެ ލީޑަޝިޕްގެ ޒިންމާއެކެވެ. މިފަދަ ކަންކަމުގައި ހަނުހުރުމާއި ދެފުށް ނުފެންނަ ގޮތަށް ކަންކަން ބެހެއްޓުމަކީ، އަހަރުތަކެއް ވަންދެން މި ކުޅިވަރަށް އިހުލާސްތެރިކަމާއެކު ހިދުމަތްކޮށްފައިވާ ފަރާތްތަކުގެ މާޔޫސްކަން އިތުރުވެ، އިތުބާރު ގެއްލޭނެ ކަމެކެވެ

ދިވެހި ރެފްރީންނަކީ ވަރަށް ދަތި އުނދަގޫ ހާލަތްތަކުގައި، ގިނަ ފަހަރަށް އެއްވެސް އުޖޫރައަކާ ނުލައި ހިލޭސާބަހަށް މަސައްކަތްކުރާ ބައެކެވެ. އެމީހުންގެ އަމިއްލަ ވަޒީފާއާއި އާއިލީ ޒިންމާތައް އެއްފަރާތްކޮށް، މަދު ވަސީލަތްތަކާއެކު މި ދާއިރާގައި ދެމިތިބީ ކުޅިވަރަށް އޮތް ލޯތްބެއްގެ ބޮޑުކަމުންނެވެ. އެހެންކަމުން، އެމީހުންގެ މި ގުރުބާނީއަށް ބޭނުންވަނީ އެމީހުންގެ ކުރިއެރުމަށް އިހުލާސްތެރިކަމާއެކު މަސައްކަތްކުރާނެ ހަރުދަނާ ނިޒާމެކެވެ

މި މައްސަލައަކީ ހަމައެކަނި ވަކި މުބާރާތެއްގެ ނުވަތަ ވަކި ނިންމުމެއްގެ ވާހަކައެއް ނޫނެވެ. މިއީ ރާއްޖޭގައި ރެފްރީން ތަރައްޤީކުރުމަށް ގެންގުޅޭ މުޅި ސިޔާސަތާ ގުޅިފައިވާ އަސާސީ މައްސަލައެކެވެ. ރެފްރީންނަށް ލިބޭ ފުރުސަތުތަކަކީ އިންސާފުވެރި ނޫން އަދި ވަކި އުސޫލެއް ނެތް ކަންކަން ކަމަށް ބެލެވޭނަމަ، ކުޅިވަރުގެ އަދުލުވެރިކަން ދަމަހައްޓާ ފަރާތްތަކުގެ ހިތްވަރު އެލިގެންދާނެއެވެ

ކުޅިވަރުގެ ހިންގުން ހަރުދަނާކުރުމަކީ ހަމައެކަނި އިދާރީ ބާރުތަކެއް ހިންގުމެއް ނޫނެވެ. އޭގެ މާނައަކީ ޒިންމާދާރުވުމާއި، އިންސާފުވެރިވުމާއި، އަދި ކުޅިވަރުގެ ހުރިހާ ދާއިރާއެއް ކުރިއެރުވުމަށް ތެދުވެރިކަމާއެކު މަސައްކަތްކުރުމެވެ. މީގެ ތެރޭގައި ރެފްރީންނަކީ މުހިންމު ބައިވެރިންނެވެ

ވޮލީބޯޅަ އާއިލާގެ އުންމީދަކީ ސާދާ ކަމެކެވެ. ރެފްރީން މެނޭޖްކުރުމުގައި އަބަދުވެސް އިސްކަންދޭންވާނީ ދިވެހި ރެފްރީންގެ ކުރިއެރުމަށެވެ. ރާއްޖޭގައި ބާއްވާ ބައިނަލްއަޤުވާމީ މުބާރާތްތަކަކީ ދިވެހި ރެފްރީންގެ ތަޖުރިބާއާއި، އިތުބާރާއި، އަދި ފަންނީ ގާބިލުކަން މަތީ ފަންތިއަކަށް ގެންދިއުމަށް ބޭނުންކުރާ ވަސީލަތްތަކަކަށް ވާންޖެހެއެވެ

މި ކުޅިވަރު ކުރިއަށްދާން ބޭނުންނަމަ، ރެފްރީން ތަރައްޤީކުރުމަކީ އިދާރީ ގޮތުން ފަހަތަށް ޖައްސާލެވިފައިވާ ކަމަކަށް ވެގެންނުވާނެއެވެ. އެއީ ރާއްޖޭގެ ވޮލީބޯޅަ ކުރިއެރުވުމުގެ އެންމެ މުހިންމު އެއް ތަނބަށް ވާންޖެހެއެވެ. ސަބަބަކީ، ކޮންމެ މުބާރާތެއްގެ ކާމިޔާބީ ބިނާވެފައިވަނީ ހަމައެކަނި ކޯޓުމަތީގައި ތިބޭ ކުޅުންތެރިންގެ މައްޗަކަށް ނޫނެވެ. އެއީ މުބާރާތް އިންސާފުވެރިކަމާއި، ފަންނީ މިންގަނޑުތަކާ އެއްގޮތަށް ކުރިއަށްގެންދާ ރެފްރީންގެ ހުނަރާއި ގާބިލުކަމުގެ މައްޗަށް ވެސް ބިނާވެފައިވާ ކަމެކެވެ